Poetë të diasporës sjellin 'Verën poetike' në 'Hivzi Sulejmani'

PRISHTINË — Në Bibliotekën "Hivzi Sulejmani" në lagjen Dardania fillon javën e ardhshme manifestimi letrar "Vera poetike e kryeqytetit – Ditët e etnisë", ku krijues nga diaspora do të takohen me lexuesit, do të dhurojnë libra për bibliotekat e kryeqytetit dhe do të mbajnë lexime e debate letrare gjatë gjithë javës.

Më 3 gusht, në orën 11:00, në "Hivzi Sulejmani" mbahet takim me poetin, publicistin dhe kritikun letrar Shefqet Dibrani, i cili prej dekadash jeton e krijon në Zvicër dhe konsiderohet një nga donatorët më të rëndësishëm të librave për bibliotekën.

Një ditë më vonë, më 4 gusht në orën 14:00, në Bibliotekën e Fëmijëve në Pallatin e Rinisë, autorja e re Blerta Kamberi, që jeton në Belgjikë, lexon pjesë nga libri "A ka arinj në Kosovë?" dhe zhvillon një punëtori krijuese me fëmijë të kryeqytetit dhe të mërgatës.

Manifestimi mbyllet më 5 gusht, në orën 11:00, po në "Hivzi Sulejmani", me një orë letrare kushtuar poezisë së fëmijëve të krijuar në diasporë dhe takim me poetin Dibran Demaku, i cili jeton e punon në Gjermani.

Burim: Epoka e Re
— Redaksia ZHURMA