Podujeva shpall gjendje emergjente për shkak të mbeturinave
Vendimi vlen deri më 5 nëntor; kryetari Bulliqi ankohet keqmenaxhimi i KRM Pastrimi që lënë qytetin pa shërbim ditë të rradha.
PODUJEVË — Komuna e Podujevës shpalli sot gjendje emergjente për shkak të gjendjes së rënduar nga mbeturinat, si pasojë e mospastrimit të tyre. Vendimi i kryetarit Shpejtim Bulliqi, njëherësh kryesues i Shtabit Emergjent për Mbrojtje dhe Shpëtim, vlen deri më 5 nëntor 2026.
Bulliqi tha se disa muaj menaxhimi me mbeturina në qytet e fshatra është rënduar. Kompania Rajonale e Mbeturinave "Pastrimi", për shkak të pamundësisë për të ofruar shërbime, më herët kërkoi të lirohet nga shërbimi në fshatra dhe kjo përgjegjësi i kaloi kompanisë private "Natyra"; tani ka probleme edhe në qytet.
"Ka raste që operon me një kamion, e ka ditë që nuk ofron shërbim fare", citohet të ketë thënë Bulliqi. Me ardhjen e mërgimtarëve vëllimi i mbeturinave është rritur, prandaj, duke pasur parasysh shëndetin e qytetarëve, ai mori rekomandimin e Drejtorisë së Shërbimeve Publike për shpalljen e emergjencës.
Kryetari tha se Komuna e ka ndihmuar KRM "Pastrimi" me subvencione për të lehtësuar operimin, por pa sukses. "Po shihet që ka keqmenaxhim nga menaxhmenti i kësaj ndërmarrjeje në qendër", ka thënë ai.
Drejtoria e Shërbimeve Publike, Mbrojtje dhe Shpëtim duhet të hartojë e zbatojë planin operacional emergjent për grumbullimin, transportimin dhe largimin e mbeturinave, si dhe të iniciojë prokurimin e përshpejtuar për 3 kamionë me qira e 3 vozitës, që do të operojnë në kuadër të KRM "Pastrimi".
Burim: Koha.net
— Redaksia ZHURMA