Pezullohen dy efektivë policie pas pamjeve të dhunës në protestë

Dy punonjës të Patrullës së Përgjithshme pranë Komisariatit të Policisë Nr. 3 janë larguar përkohësisht nga detyra me urdhër të Drejtorit të Përgjithshëm, Skënder Hita. Vendimi erdhi pas publikimit të pamjeve në rrjetet sociale, të cilat, sipas Policisë së Shtetit, tregonin tejkalim të kompetencave dhe shkelje të parimit të proporcionalitetit gjatë ndërhyrjes së forcave të rendit në një tubim.

Inspektorët e përfshirë në këtë rast janë identifikuar me inicialet E. P. dhe T. Ç. Krahas pezullimit, Drejtoria e Standardeve Profesionale është urdhëruar të nisë hetimin disiplinor ndaj tyre. Ministri i Punëve të Brendshme, Ervin Demo, theksoi se reagimi i strukturave të rendit gjatë situatave të tensionuara dhe përplasjeve pranë Ministrisë së Arsimit duhet të jetë proporcional dhe në përputhje me ligjin, duke shtuar se ligji do të zbatohet njësoj si për personat që kryejnë akte dhune ashtu edhe për efektivët që shkelin kompetencat e tyre.