Përmbytjet në Stamboll bllokojnë këngëtarin Murat Boz dhe aktoren Demet Özdemir

Reshjet e dendura të shiut në Stamboll janë kthyer në momente ankthi për këngëtarin Murat Boz dhe aktoren Demet Özdemir, të cilët mbetën të bllokuar në studiot Phoenix pasi zona u përfshi nga përmbytjet. Ngjarja ndodhi në zonën e Ayazağa-s, në lagjen Sarıyer, ku niveli i ujit arriti rreth dy metra dhe përfshiu ambientet e studios, ndërsa ndërprerja e energjisë elektrike e vështirësoi situatën për rreth 200 deri në 250 persona që ndodheshin brenda.

Dyshja iu drejtua rrjeteve sociale për të kërkuar ndihmë. Këngëtari zhvilloi një transmetim të drejtpërdrejtë për të treguar përmasat e situatës, ndërsa aktorja shkroi se uji po ngrihej në ndërtesë dhe kërkoi ndërhyrjen e autoriteteve. Për shkak të nivelit të lartë të ujit, ekipet e emergjencës u detyruan të ndërhynin me gomone për të realizuar evakuimin e personave të bllokuar. Më vonë, Murat Boz njoftoi përmes rrjeteve sociale se kishte nisur evakuimi.