Diskutimet për provimin e jurisprudencës në gjuhën shqipe

Driton Sulejmani, gjatë një paraqitjeje, theksoi se zgjidhja që ofrojnë parasheh që mbi 75% e provimit të jetë në gjuhën shqipe, duke shtuar se për momentin nuk ka mundësi të jetë 100% dhe se kjo zgjidhje ua lehtëson dukshëm dhënien e provimit studentëve. Nga ana tjetër, deputetja Saranda Imeri Stafai deklaroi se provimi i jurisprudencës do të jepet në gjuhën shqipe, duke përfshirë pjesën teorike dhe praktike në tërësi, dhe se nuk qëndrojnë pretendimet se një pjesë do të jetë në maqedonisht e pjesa tjetër në shqip. Ajo shtoi se për herë të parë pas gjashtë dekadash studentët do ta japin këtë provim në shqip. Gjatë javës së ardhshme ndërkaq është paralajmëruar një takim mes ministrit të Drejtësisë, Jeton Shasivari, dhe studentëve, ku do të prezantohen metodologjia dhe procedura e dhënies së provimit.