Pacientët onkologjikë protestojnë në Shkup — barnat munguan 3 herë që nga maji
Përfaqësuesit e shoqatës Hema-Onko thonë se që nga muaji maj barna të caktuara kanë munguar tri herë në Klinikën e Onkologjisë.
SHKUP — Pacientët onkologjikë në Maqedoninë e Veriut do të mbajnë sot një protestë simbolike para Ministrisë së Shëndetësisë për të kundërshtuar mungesën e vazhdueshme të terapisë në Klinikën e Onkologjisë. Për shkak të temperaturave ekstremisht të larta, në këtë tubim do të marrin pjesë vetëm disa pacientë.
Ana Marjanoviq nga shoqata “Hema-Onko” u shpreh se kjo situatë i bën pacientët të ndihen të pambrojtur dhe të frikësuar, kur rekomandimi kryesor për ta është ulja e stresit. Sipas saj, që nga muaji maj barnat kanë munguar tri herë në klinikë.
Mungesa e fundit nuk lidhet vetëm me terapitë biologjike, por prek edhe citostatikët si dhe barnat e tjera jetike që ndodhen në listën pozitive. Këto mungesa që përsëriten çdo një ose dy muaj përbëjnë një problem mjaft të madh për pacientët që kanë nevojë për trajtim të vazhdueshëm.
Nga ana tjetër, drejtori i Klinikës së Onkologjisë, Igor Stojkovski, deklaroi se shumica e preparateve ka mbërritur dhe pjesa tjetër vjen këtë javë. Stojkovski sqaroi se vonesat për barnat e listës pozitive të Fondit Shëndetësor erdhën për shkak të rritjes së konsumit dhe mungesës te distributorët.
Pacientët onkologjikë prej vitesh përballen me këtë problematikë, ndërsa alarmojnë edhe për kushtet krejtësisht çnjerëzore në Klinikë, mbingarkesën me pacientë dhe problemet me skriningjet. Pavarësisht pretendimeve se trajtimi nuk është vënë në pikëpyetje, pacientët vazhdojnë të përballen me frikë të madhe çdo ditë.
Burim: Tetova Sot
— Redaksia ZHURMA