Osmani: Kam biseduar me Trumpin dhe Rubio për NATO-n

PRISHTINË — Vjosa Osmani, kandidatja e LDK-së për deputete në Kuvendin e Kosovës, tha se ka diskutuar për "anëtarësim të përshpejtuar" të Kosovës në NATO me Presidentin amerikan Donald Trump dhe Sekretarin e Shtetit, Marco Rubio. Ajo shtoi se kishte arritur të ruajë dhe forcojë raportet me Shtetet e Bashkuara, pavarësisht tensioneve mes Qeverisë së Albin Kurtit dhe aleatëve perëndimorë.

Në një intervistë në KTV, Osmani tha se gjatë mandatit të saj në Presidencë ka pasur shumë momente të rënda, por kishte ndërtuar raporte të tilla me Uashingtonin. "Kam arritur që ta ndërtoj një relacion aq të fortë me Amerikën", deklaroi ajo.

Sekretari amerikan i Shtetit, Marco Rubio, tha se NATO aktualisht është e përqendruar në prioritete të tjera dhe se çështja e zgjerimit nuk ka qenë pjesë e rëndësishme e diskutimeve të fundit. Rubio shtoi se kjo nuk do të thotë se zgjerimi nuk mund të ndodhë në të ardhmen, por theksoi se çështja e zgjerimit nuk është në krye të agjendës së NATO-s.

Anëtarësimi në NATO ishte një prej zotimeve kryesore të Albin Kurtit në zgjedhjet e vitit 2021 dhe u përfshi edhe në programin qeverisës 2021-2025. Kurti kishte premtuar aplikimin për anëtarësim në NATO, anëtarësimin në Kartën e Adriatikut dhe hyrjen në Partneritetin për Paqe.

Pesë vjet më vonë, asnjëra prej këtyre objektivave nuk është realizuar. Qeveria kishte themeluar edhe një Grup Punues për anëtarësim në NATO, të udhëhequr nga ministrja e Jashtme Donika Gërvalla. Megjithatë, nuk dihet të jetë mbajtur ndonjë mbledhje e këtij grupi, të jetë hartuar ndonjë dokument apo të jetë ndërmarrë ndonjë iniciativë konkrete.

Në programin e ri zgjedhor, Kurti ka reduktuar zotimet për NATO-n, duke e paraqitur zgjerimin e marrëveshjeve "SOFA" si rrugë drejt afrimit me aleancën. Marrëveshjet SOFA janë marrëveshje bilaterale që rregullojnë statusin juridik të personelit ushtarak të huaj në një shtet pritës.

Kosova tashmë ka një marrëveshje SOFA me Shtetet e Bashkuara, të ratifikuar në Kuvend në vitin 2012. Sipas dokumenteve të Departamentit amerikan të Mbrojtjes, juridiksioni penal mbi ushtarët amerikanë në Kosovë i takon autoriteteve të ShBA-së.

Burim: Nacionale

— Redaksia ZHURMA