Osmani kërkon rishikimin e vendimit 'non grata' për 2 qytetarët e Çairit
Nënkryetari i BDI-së u bëri thirrje autoriteteve në Tiranë të mbajnë derën e hapur për shqiptarët jashtë kufijve, duke respektuar sovranitetin e shtetit.
SHKUP — Nënkryetari i Bashkimit Demokratik për Integrim (BDI), Bujar Osmani, ka reaguar pas vendimit të Shqipërisë për të shpallur “non grata” dy qytetarë nga Çairi. Osmani kërkoi që të dyja palët të tregojnë mirëkuptim e të komunikojnë, me qëllim që kjo çështje e ndjeshme të sqarohet dhe vendimi përfundimisht të rishikohet.
Sipas tij, çdo qytetar i Maqedonisë së Veriut duhet ta respektojë sovranitetin e Shqipërisë dhe të shmangë përfshirjen në përplasjet e brendshme politike atje. Megjithatë, ai theksoi se Tirana duhet ta marrë parasysh lidhjen e veçantë historike e emocionale që shqiptarët jashtë kufijve kanë me shtetin shqiptar, pa e parë atë si të huaj.
Ndalimi i hyrjes për dy qytetarët nga Çairi pason masat e fundit ndaj analistit Valon Bela dhe imamit Bekir Halimi. Osmani bëri apel që Shqipëria të mbetet një derë e hapur për të gjithë shqiptarët kudo që jetojnë, ndërsa këta të fundit duhet ta respektojnë atë si shtet sovran.
Burim: Shenja
— Redaksia ZHURMA