Organizatat paralajmërojnë kolaps të shërbimeve sociale në Kosovë
Koalicioni i OJQ-ve për Mbrojtjen e Fëmijëve dhe Rrjeti i Grave të Kosovës protestuan në sheshin “Ibrahim Rugova” duke kërkuar buxhet më të lartë për vitin 2027.
Redaksia ZHURMA · · 2 min lexim
Koalicioni i OJQ-ve për Mbrojtjen e Fëmijëve (KOMF), që përbëhet nga 35 organizata anëtare, dhe Rrjeti i Grave të Kosovës, me 108 organizata anëtare, kanë zhvilluar një protestë në sheshin “Ibrahim Rugova” në Prishtinë. Përfaqësueset e këtyre organizatave kanë kërkuar nga deputetët e Kuvendit të Kosovës që të rrisin mjetet financiare për shërbimet sociale dhe familjare gjatë shqyrtimit të Buxhetit për vitin 2027.
Donjeta Kelmendi nga KOMF ka deklaruar se ndarjet aktuale nuk përkojnë me nevojat e qytetarëve. «Ndarjet aktuale buxhetore nuk përkojnë me nevojat reale të sektorit të shërbimeve sociale dhe është shumë prapa si buxhet nevojave që kanë fëmijët, gratë, qytetarët në nevojë për shërbime sociale dhe familjet», u shpreh ajo, duke shtuar se vetëm rreth dy për qind e buxhetit të mbrojtjes sociale shkon për këtë sektor, ndërsa pjesa tjetër orientohet te transferet dhe skemat.
Nga Rrjeti i Grave të Kosovës, Besarta Breznica ka kërkuar që buxheti i ardhshëm të garantojë financim të qëndrueshëm për mbrojtjen e grave dhe fëmijëve. «Kur një grua raporton dhunën dhe kërkon mbrojtje, ajo duhet të ketë ku të shkojë atë ditë», theksoi ajo. Sipas organizatave, qendrat për punë sociale ndodhen në prag kolapsi, kurse subjektet e licencuara rrezikojnë mbylljen ose pezullimin e aktivitetit të tyre.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar