Shtrohet me malarie në QKUK shtetasja e huaj — gjendja e saj stabilizohet
Pacientja u pranua në gjendje të rëndë më 1 gusht pas një udhëtimi në vende ku sëmundja është endemike, por aktualisht gjendja e saj është stabilizuar.
PRISHTINË — Një shtetase e huaj po trajtohet në Klinikën Infektive, pasi QKUK konfirmoi rastin me malarie pas ekzaminimeve specifike. Pacientja ishte pranuar më 1 gusht në gjendje të rëndë shëndetësore dhe pa vetëdije, por mjekët infektologë njoftojnë se gjendja e saj tashmë është e qëndrueshme.
Sipas vlerësimit epidemiologjik, pacientja kishte udhëtuar së fundmi në vende ku malaria është endemike. Pas fillimit të trajtimit specifik antimalarik, ajo tashmë komunikon lirshëm dhe parametrat e saj vitalë po kthehen në normale. QKUK sqaron se malaria nuk transmetohet nga personi në person përmes kontaktit të zakonshëm.
Deri më tani, në Kosovë nuk është evidentuar asnjë rast i transmetimit lokal të kësaj sëmundjeje. Gjatë periudhës 2022–2025 në vend janë raportuar gjithsej tetë raste të malaries, të cilat kanë qenë të gjitha të importuara nga personat që kishin udhëtuar në vende të ndryshme të kontinentit afrikan.
Burim: Gazeta Express
— Redaksia ZHURMA
