Nëna e kthyer nga emigracioni në protestën e 92-të: Atdheu është në rrezik
Një nënë e kthyer nga emigracioni iu bashkua protestës së ditës së 92-të përpara Kryeministrisë, duke bërë thirrje për mobilizim.
Në protestën e ditës së 92-të përpara Kryeministrisë, një grua që u kthye nga emigracioni mbajti një fjalim nga foltorja e improvizuar. Ajo falënderoi qytetarët që vijojnë të qëndrojnë në shesh pavarësisht temperaturave të larta dhe lodhjes, dhe u bëri thirrje prindërve të tjerë t'u bashkohen të rinjve.
“Unë jam një nënë shqiptare e kthyer nga emigracioni sepse thashë se atdheu është në rrezik. Nënat e tjera duhet të vijnë këtu në krah të fëmijëve tanë!” apeloi ajo. Ajo tha se vendimi për t'u kthyer lidhet me atë që e cilësoi si një moment rreziku për vendin.
Gjatë fjalës së saj, ajo denoncoi incidente gjatë marshimit nga Sheshi “Skënderbej” drejt godinës së ekzekutivit, ku sipas saj persona të identifikuar si “patronazhistë” hodhën vezë nga lart në drejtim të protestuesve, duke i cilësuar si tentativa për të provokuar turmën. “Ata mundohen me çdo mënyrë të provokojnë protestuesit, por nuk do të fitojnë asnjëherë sepse kauza e tyre është e sëmurë dhe e vdekshme”, tha ajo.
Në përmbyllje, ajo deklaroi se lëvizja qytetare do të vijojë pavarësisht përpjekjeve për ta ndalur. “Kauza e protestuesve është e madhe dhe e fuqishme sepse kërkon mbrojtjen e të drejtave. Ndaj kauza jonë është e qartë, ajo është e pavdekshme! Vala e protestuesve nuk pushon asnjëherë!”, përfundoi ajo.