Nëna e dy vëllezërve arrestohet për shtytje në vrasjen në Prizren
Pse u ndalua nga prokuroria nëna e dy vëllezërve të dyshuar për vrasjen e kushëririt të tyre në fshatin Koraj?
PRIZREN — Dy vëllezër janë arrestuar në fshatin Koraj të Prizrenit nën dyshimin se kanë therur me thikë kushëririn e tyre, duke i shkaktuar plagë vdekjeprurëse. Përveç viktimës që ndërroi jetë nga plagët e marra, lëndime trupore gjatë këtij incidenti ka pësuar edhe babai i tij.
Rasti ka nxitur reagimin e menjëhershëm të autoriteteve policore të cilat kanë filluar bastisjet. Zëdhënësi i Policisë së Kosovës për rajonin e Prizrenit, Shaqir Bytyqi, konfirmoi se aksioni nisi dje rreth orës 15:00, duke kontrolluar fillimisht shtëpinë e dy vëllezërve të dyshuar.
Më pas, hetuesit policorë kanë vazhduar kontrollet edhe në shtëpinë e viktimës. Sipas zyrtarit policor Shaqir Bytyqi, gjatë këtyre bastisjeve në të dyja lokacionet nuk është gjetur asnjë send apo provë e kundërligjshme që mund të ndihmonte në ndriçimin e rastit.
Në kuadër të veprimeve hetimore, policia ka intervistuar disa dëshmitarë për të mësuar rrethanat. Më pas, me urdhër të Prokurorit kujdestar, është intervistuar edhe nëna e të dyshuarve në cilësinë e të dyshuarës për veprën penale "Shtytje në vrasje".
Intervistimi i nënës së dy vëllezërve u krye në prezencë të mbrojtëses së saj. Pas përfundimit të procedurës, me vendim të Prokurorit kujdestar, e dyshuara është ndaluar për 48 orë për veprime të mëtejshme ligjore.
Burim: Lajmi.net
— Redaksia ZHURMA