Ndërpritet furnizimi me ujë në disa rrugë të Bregut të Diellit
Një dëmtim në rrjetin e ujësjellësit lë pa ujë disa rrugë në kryeqytet.
Redaksia ZHURMA · · 1 min lexim
PRISHTINË — Banorët e disa zonave në Prishtinë janë përballur me ndërprerje të përkohshme të furnizimit me ujë për shkak të një defekti në rrjet. Problemi ka ardhur nga dëmtimi i një gypi me diametër DN 150 milimetra në lagjen Bregu i Diellit, ndërsa ekipet teknike kanë dalë në terren për të nisur punën për sanimin e tij.
Ndërprerja përfshin rrugët Hyzri Talla, Ilir Durmishi, Besa dhe Fadil Ferati, si dhe zonën rreth qendrës tregtare. Për shkak të kompleksitetit të ndërhyrjes që kërkon kohë, rikthimi i rregullt i furnizimit pritet të bëhet gjatë ditës së nesërme. Konsumatorëve të prekur u është kërkuar mirëkuptim deri në përfundimin e plotë të punimeve dhe normalizimin e gjendjes.
