Pse Ministria e Drejtësisë thotë se Gruevski mbetet shtetas i Maqedonisë së Veriut?
Procedura për ekstradimin e ish-kryeministrit Nikolla Gruevski vazhdon pavarësisht spekulimeve për shtetësinë hungareze.
SHKUP — Ministria e Drejtësisë e Maqedonisë së Veriut ka reaguar pas informacioneve se ish-kryeministri Nikolla Gruevski ka marrë nënshtetësinë hungareze. Në një njoftim zyrtar, ministria thotë se e monitoron nga afër situatën dhe se Gruevski mbetet shtetas i Republikës së Maqedonisë së Veriut.
"Pavarësisht të gjitha spekulimeve dhe informacioneve jozyrtare në lidhje me statusin e tij të mundshëm në Hungari, Nikola Gruevski mbetet shtetas i Republikës së Maqedonisë së Veriut dhe është një person që i nënshtrohet vendimeve gjyqësore përfundimtare dhe procedurave aktive", thuhet në njoftim.
Ministria thekson se procedura për ekstradimin e tij vazhdon në përputhje me legjislacionin vendas, marrëveshjet dypalëshë dhe konventat ndërkombëtare. "Brenda kuadrit të kompetencave të saj, Ministria do të vazhdojë të ndërmarrë të gjitha hapat e nevojshëm ligjorë dhe diplomatikë në komunikim me autoritetet kompetente të Hungarisë", shtohet në komunikatë.
Burim: Telegrafi
— Redaksia ZHURMA