Mediat iraniane raportojnë për shpërthime në provincën jugore të Hormozganit

Shpërthime të shumta janë raportuar në disa lokacione në provincën jugore të Hormozganit në Iran, përfshirë ishullin Keshm, Sirik, Jask dhe Bandar Abas. Raportimet nga mediat shtetërore iraniane vijnë me informacione kundërthënëse lidhur me përgjegjësinë dhe origjinën e këtyre shpërthimeve në këtë rajon strategjik detar.

Kjo ngjarje pason raportimet paraprake se Uashingtoni dhe Tel Avivi kishin planifikuar operacione ushtarake kundër Iranit. Ndërkohë, presidenti amerikan Donald Trump konfirmoi se forcat e Shteteve të Bashkuara të Amerikës kishin kryer sulme të kufizuara ndaj një sistemi ajror iranian më 6 nëntor. SHBA-ja dhe Izraeli kishin nisur sulmet ndaj Iranit që në fund të shkurtit, ku Trump ka përsëritur vazhdimisht se qëllimi kryesor i fushatës ushtarake amerikane është pamundësimi i posedimit të armëve bërthamore nga ana e Iranit.

Televizioni shtetëror iranian njoftoi se origjina e shpërthimeve mbetet e paqartë, duke sugjeruar mundësinë se ato lidhen me aktivitetin ushtarak iranian për mbrojtjen e Ngushticës së Hormuzit. Agjencia shtetërore e lajmeve IRNA fillimisht raportoi për dy shpërthime në pjesën lindore të ishullit Keshm, ndërsa banorë lokalë njoftuan për shpërthime afër Jaskut. Edhe agjencia Fars raportoi për shpërthime, por sqaroi se nuk dihen vendndodhjet e sakta apo arsyet e tyre.

Në mediat iraniane u pretendua paraprakisht se mbrojtja ajrore vendase kishte shkatërruar një dron amerikan mbi ishullin Keshm, ndonëse Trump nuk specifikoi vendndodhjen e sulmeve amerikane të 6 nëntorit. Ishulli strategjik Keshm ndodhet në hyrje të Ngushticës së Hormuzit, që shërben si një nga rrugët më të rëndësishme detare në botë për transportin e energjisë. Gazeta The Wall Street Journal ka raportuar se në këtë ishull ndodhen një objekt i madh nëntokësor për raketa, një bazë detare si dhe një impiant i madh për shkripëzimin e ujit. Ky ishull ka qenë objektiv i forcave amerikane gjatë fazave të mëhershme të luftimeve, teksa zyrtarët amerikanë kanë diskutuar edhe mundësinë e marrjes së kontrollit të tij.

Krahas zhvillimeve ushtarake në rajon, Garda Revolucionare e Iranit (IRGC) njoftoi se ka hequr kufizimin e mëparshëm prej 2 mijë kilometrash për rrezen e raketave të saj balistike. Zëdhënësi i kësaj me garde, gjeneral brigadieri Hossein Mohebbi, deklaroi se Irani do të vazhdojë të rrisë rrezen e veprimit të raketave të tij. Në rrafshin diplomatik, Uashingtoni po mban kontakte me Teheranin. Presidenti Trump deklaroi: «Ne po bisedojmë me Iranin. Kemi qenë në kontakt. Ata, me dëshpërim, duan një marrëveshje». Në të njëjtën kohë, në Izrael, presidenti Isaac Herzog ia ka besuar liderit të opozitës, Gadi Eisenkot, mandatin për formimin e qeverisë së re, pas zgjedhjeve parlamentare që lënë pa shumicë blloqet kryesore.