Kuvendi dështon të konstituohet në afatin ligjor — mbyllen dyert e sallës
Deputeti Besnik Tahiri tha se salla u mbyll pavarësisht kërkesës së AAK-së drejtuar kryesuesit Avni Dehari, kurse afati i konstituimit skadon sonte në 23:59.
PRISHTINË — Dyert e sallës së seancave në Kuvendin e Kosovës janë gjetur të mbyllura sonte, duke pamundësuar mbajtjen e seancës konstituive në afatin e fundit ligjor. Këtë e ka bërë të ditur deputeti i Aleancës për Ardhmërinë e Kosovës, Besnik Tahiri, i cili konfirmoi se salla ka qenë e mbyllur për deputetët.
Sipas Tahirit, grupi parlamentar i AAK-së e ka njoftuar me kohë administratën dhe i ka bërë kërkesë zyrtare kryesuesit të seancës, Avni Dehari, për vazhdimin e punimeve. Megjithatë, dyert kanë mbetur të mbyllura përkundër faktit që sot më 7 gusht skadon afati prej 30 ditësh për konstituimin e legjislaturës së re.
Tahiri sqaroi se si grup parlamentar kanë kërkuar caktimin e menjëhershëm të vazhdimit të seancës, por ajo është shtyrë për nesër. Ky vendim e kalon afatin ligjor, ndonëse deputetët tentuan të mblidheshin për shkak se sonte para mesnatës skadon afati kushtetues për konstituimin e plotë të Kuvendit.
Burim: Sinjali
— Redaksia ZHURMA
