Mbi 307 mijë banesa të pabanuara në Maqedoni, çmimet në rritje
Gjatë pesë viteve u ndërtuan mbi 36 mijë banesa, por mbi 307 mijë të tjera qëndrojnë bosh, ndërsa çmimet në Shkup dhe Ohër kaluan 3 mijë euro për metër katror.
Në Maqedoni, mbi 307 mijë banesa janë të pabanuara, ndërsa çmimet për metër katror në lokacionet më atraktive në Shkup dhe Ohër kanë kaluar 3.000 euro. Të dhënat nga regjistrimi i fundit i popullsisë tregojnë se më shumë se një e treta e fondit të banesave është bosh, edhe pse gjatë pesë viteve janë ndërtuar mbi 36.000 banesa të reja.
Sipas të dhënave të Entit Shtetëror të Statistikave, nga viti 2020 deri në vitin 2025 janë përfunduar 36.281 banesa, me sipërfaqe të përgjithshme mbi 3,26 milionë metra katrorë. Sipërfaqja mesatare e një banese të re është rreth 90 metra katrorë, ndërsa më së shumti janë ndërtuar banesa me tri dhoma – 12.038, të ndjekura nga ato me dy dhoma – 11.129.
Regjistrimi i vitit 2021 evidentoi se nga 839.174 banesa gjithsej, 531.987, ose 63,4 për qind, ishin të banuara, duke lënë mbi 307 mijë banesa bosh. Kjo ngre pyetjen se pse çmimet vazhdojnë të rriten pavarësisht ofertës së madhe në tregun e pasurive të paluajtshme.