Mbesa e komandantit Fadil Nimani me akuza të rënda ndaj Haradinajve: E degraduat dhe e spiunuat te KFOR-i italian
Rina Tahiraj, mbesa e ish-komandantit të UÇK-së, Fadil Nimani – “Tigri”, ka ngritur akuza të forta ndaj Ramush dhe Daut Haradinajt, duke pretenduar se daja i saj është trajtuar padrejtësisht pas përfundimit të luftës.
Në reagimin e saj, Tahiraj e përshkruan Fadil Nimanin si një prej figurave më të afta të UÇK-së dhe pretendon se ai u largua gradualisht nga pozita që kishte në TMK.
Sipas saj, pozita e Nimanit nuk ishte rezultat i emërimeve politike, por ishte fituar përmes aftësive, kontributit në luftë dhe autoritetit që kishte.
“Ju e keni degradu dajën tem, e keni ulë prej pozitës që e kishte fitu me aftësi, me luftë dhe me autoritet”, ka shkruar Tahiraj.
Tahiraj bën edhe një pretendim tjetër, duke thënë se Fadil Nimani ishte denoncuar te KFOR-i italian nën dyshimin se posedonte armë në shtëpi. Ajo pretendon se pas këtij denoncimi, shtëpia e tij ishte bastisur.
Sipas versionit të saj, kjo nuk ishte e vetmja masë ndaj Nimanit, pasi ai fillimisht ishte degraduar, më pas i ishte marrë pozita dhe, në fund, ishte larguar nga TMK-ja.
Për këtë të fundit, Tahiraj përmend edhe ish-komandantin e TMK-së, Agim Çekun, duke pretenduar se ai kishte dhënë urdhër për largimin e Fadil Nimanit nga TMK-ja.
“Fadili u spiunua prej jush, iu bastis shpija, u degradue prej jush, iu mor pozita prej jush, u zëvendësu prej jush, dhe në fund u hjek krejt prej TMK-së”, thuhet në reagimin e saj.
Përveç trajtimit që, sipas saj, iu bë Nimanit pas luftës, Tahiraj shtron edhe çështjen e mungesës së një simboli përkujtimor në Kosovë që do ta mbante emrin e tij.
Ajo pyet se si është e mundur që një figurë që e konsideron ndër më të rëndësishmet e UÇK-së dhe TMK-së të mos ketë një rrugë, shtatore apo përmendore në Kosovë.
“Qysh është e mundshme që një prej njerëzve ma të zotë, ma të mençëm dhe ma të rëndësishëm që ka pasë UÇK-ja, e ma vonë edhe TMK-ja, sot në Kosovë mos me pasë as një rrugë me emrin e tij, as një shtatore, as një përmendore?”, shkruan Tahiraj.
Akuzat e ngritura nga Rina Tahiraj janë pretendime të saj dhe nuk janë të verifikuara në mënyrë të pavarur. Ramush Haradinaj, Daut Haradinaj dhe Agim Çeku duhet të kenë mundësinë të japin versionin e tyre lidhur me këto deklarime.