Mashtrime të reja në bankingun online zviceran — pse bankat nuk mbrojnë 24/7?
Pse vetëm dy banka zvicerane ofrojnë ndihmë emergjente gjatë gjithë kohës kur kriminelët zbrazin llogaritë përmes phishingut?
CYRIH — Persona të panjohur po paraqiten si punonjës bankash në Zvicër, duke telefonuar qytetarët me alarmin e rremë të "aktivitetit të dyshimtë" në llogaritë e tyre. Përmes kësaj skeme, ata marrin të dhënat e hyrjes në bankingun online dhe më pas zbrazin llogaritë.
Sipas transmetuesit publik SRF, reagimi i shpejtë është vendimtar për të ndalur transaksionet e paligjshme. Por vetëm një numër i kufizuar bankash ofrojnë mbështetje telefonike 24 orë për rastet e mashtrimeve në bankingun online. Në disa banka të mëdha, shërbimi urgjent mbyllet me orarin e punës.
Bankat bëjnë dallim mes kanaleve: për kartela bankare dhe Twint, shumica ofrojnë ndihmë 24/7. Por për mashtrimet në banking online — ku kriminelët fitojnë qasje të plotë në llogari — vetëm UBS dhe PostFinance kanë linja emergjente gjatë gjithë kohës.
Autoriteti mbikëqyrës financiar FINMA ka kritikuar bankat për këtë mungesë, duke e quajtur problem të vazhdueshëm në mbrojtjen e konsumatorëve. Organizatat e konsumatorëve po kërkojnë rregulla më të forta, por qeveria federale nuk sheh nevojë për ndryshime ligjore për momentin.
Ekspertët këshillojnë qytetarët që në rast dyshimi të kontaktojnë menjëherë bankën dhe të bllokojnë llogarinë. Por kur bankat nuk iu përgjigjen natën, dëmi mund të jetë i kryer deri në mëngjes.
Burim: Albinfo.ch
— Redaksia ZHURMA