Si do të funksionojë robotaksi i Uber dhe WeRide në Cyrih?

CYRIH — Kompania amerikane Uber dhe kompania kineze WeRide planifikojnë të lansojnë një shërbim komercial robotaksi në rajonin e Cyrihut deri në fund të vitit 2026. Projekti synon ta bëjë Cyrihun rajonin e parë në Zvicër ku pasagjerët mund të porosisin taksi autonome përmes aplikacionit të Uber-it.

Fillimi i operimit mbetet i kushtëzuar nga miratimet rregullatore të autoriteteve zvicerane. Flota do të zgjerohet gradualisht, me synim funksionim plotësisht pa shofer në të ardhmen. Menaxhimi i flotës do të kryhet nga kompania e mobilitetit me bazë në Cyrih, Rydera.

Testimet me automjete autonome po zhvillohen tashmë në rajonin Furttal të kantonit të Cyrihut. WeRide ka marrë leje nga Zyra Federale e Rrugëve ASTRA për operime testuese që nga fundi i 2025-s.

Zona e testimeve përfshin një rrjet prej rreth 110 kilometrash dhe rreth 460 ndalesa. Automjetet kanë qarkulluar me shpejtësi deri në 80 km/h, në bashkëpunim me shkolla lokale të vozitjes dhe me një shofer sigurie në bord.

Sipas WeRide, automjetet kanë operuar në kushte të ndryshme trafiku dhe moti, me synimin për të garantuar përputhje të plotë me rregullat e trafikut zviceran. Projekti vjen si pjesë e zgjerimit ndërkombëtar të bashkëpunimit mes dy kompanive, të cilat tashmë ofrojnë shërbime robotaksi në Abu Dhabi, Dubai dhe Riyadh.

Me këtë projekt, Cyrihu mund të bëhet një nga qytetet e para evropiane ku teknologjia e taksive autonome ofrohet në mënyrë komerciale në shkallë më të gjerë. Zvicra deri më tani ka qenë e kujdesshme me regjistrimin e automjeteve autonome në rrugë publike — miratimi në Cyrih do të shënojë një hap të rëndësishëm për tërë vendin.

Burim: Albinfo.ch
— Redaksia ZHURMA