Maqedonia zgjat afatin për mbështetjen e kyçjeve me gaz

SHKUP — Ministria e energjisë, minierave dhe burimeve minerale ka zgjatur afatin për aplikim në programin e mbështetjes shtetërore për ngrohje me gaz. Sipas Programit për nxitjen e furnizimit me gaz në amvisëri, afati i ri për paraqitjen e kërkesave është 31 tetori 2026, duke zgjeruar mundësitë për qytetarët që ende nuk kanë arritur të aplikojnë.

Familjet e cilat këtë vit do të kyçen në rrjetin e gazit natyror ose do të blejnë një kaldajë me gaz mund të përfitojnë deri në 30.000 denarë, përkatësisht 70 për qind të shpenzimeve të realizuara. Çdo amvisëri mund të paraqesë vetëm një kërkesë dhe duhet ta përmbushë kriteret e përcaktuara.

Për zbatimin e masës janë siguruar 3 milionë denarë, të ndarë sipas parimit "i pari që aplikon – i pari që përfiton", deri në shterimin e fondit. Një komision i formuar nga Ministria do t'i shqyrtojë aplikimet dhe do t'u pagojë mbështetjen atyre përfituesve që i plotësojnë kushtet.

Të drejtë aplikimi kanë amvisëritë që realizojnë kyçje në sistemin e gazit natyror këtë vit, si dhe ato që blejnë kaldaje për objekte tashmë të kyçura deri më 1 janar 2026. Më shumë informacione mund t'i gjejnë qytetarët në faqen zyrtare të Ministrisë.

Ministria e energjisë thotë se zgjatja e afatit synon t'u japë më shumë qytetarëve mundësi ta shfrytëzojnë këtë masë dhe të ulin shpenzimet për ngrohje, duke përdorur njëkohësisht një burim energjie më të pastër dhe më efikas. Mbështetja e qytetarëve dhe përmirësimi i efikasitetit energjetik mbeten ndër prioritetet kryesore të ministrisë.

Burim: Tetova Sot
— Redaksia ZHURMA