Maqedonia e Veriut dështon të ndalojë trafikimin — 46 viktima në 5 vjet
Raporti i Departamentit Amerikan të Shtetit vë në dukje se vendi nuk përmbush plotësisht standardet minimale për eliminimin e kësaj dukurie.
SHKUP — Autoritetet në Maqedoninë e Veriut kanë identifikuar 46 viktima të trafikimit me qenie njerëzore përgjatë periudhës pesëvjeçare mes viteve 2019 dhe 2024, duke dëshmuar praninë e vazhdueshme të këtij krimi të organizuar. Të dhënat janë bërë publike në Ditën Botërore Kundër Trafikimit me Njerëz, që shënohet çdo 30 korrik.
Sipas raportit të vitit 2025 nga Departamenti Amerikan i Shtetit, Maqedonia e Veriut bën përpjekje të konsiderueshme përmes hetimeve dhe procedurave operative, por ende dështon të përmbushë plotësisht standardet minimale për eliminimin e trafikimit. DASH vë në dukje se numri i trafikantëve të dënuar ka shënuar rënie në krahasim me më parë.
Në këtë dështim ndikon edhe mungesa e mjeteve financiare nga ana e Qeverisë për ekipet mobile, të cilat luajnë rolin kryesor në zbulimin e viktimave të mundshme. Mungesë të theksuar burimesh ka pasur edhe në Prokurorinë për Ndjekjen e Krimit të Organizuar dhe Korrupsionit, duke penguar trajtimin efikas të rasteve nën juridiksion.
Për më tepër, Këshilli i Evropës ka alarmuar se viktimat në vend përballen me zvarritje të stërzgjatura të proceseve gjyqësore dhe administrative, çka vështirëson riintegrimin e tyre. Ndërkaq, një shqetësim i madh mbetet martesa e detyruar e vajzave të mitura, e cila në raste të caktuara përbën formë të trafikimit me qenie njerëzore.
Në nivel global, Organizata Ndërkombëtare e Punës ka regjistruar rreth 27.6 milionë njerëz që jetojnë në skllavëri moderne. Kjo ditë e OKB-së fokusohet këtë vit te njerëzit e bllokuar nga mashtrimet me punë online dhe krimi kibernetik.
Burim: Portalb
— Redaksia ZHURMA