Maqedonci dhe ambasadori francez Huchet diskutojnë për mbrojtjen

Ministri i Mbrojtjes i Kosovës, Ejup Maqedonci, ka pritur në takim ambasadorin e ri të Francës në Kosovë, Jean-François Huchet, me të cilin ka diskutuar për avancimin e bashkëpunimit bilateral në fushën e mbrojtjes. Përmes një njoftimi në Facebook, ministri Maqedonci bëri të ditur se gjatë këtij takimi është diskutuar për mundësitë e shtrirjes së bashkëpunimit ndërmjet dy shteteve në këtë sektor të rëndësishëm.

Sipas njoftimit të Ministrisë së Mbrojtjes, diplomati francez e ka uruar ministrin Maqedonci për mandatin e ri, duke shprehur gatishmërinë për thellimin e bashkëpunimit ndërmjet Kosovës dhe Francës, në bashkëpunim të ngushtë me Ministrinë e Mbrojtjes së Francës. Nga ana e tij, ministri Maqedonci e ka falënderuar ambasadorin francez për gatishmërinë e shprehur dhe ka vlerësuar lart rolin e Francës si aleat i rëndësishëm i Republikës së Kosovës.

Ministri Maqedonci ka theksuar se Kosova synon ta avancojë partneritetin me shtetin francez, veçanërisht në fushën e trajnimeve, shkollimit ushtarak dhe industrisë së mbrojtjes. Ai ka bërë të ditur se e ka njoftuar ambasadorin e ri edhe për zhvillimin e kapaciteteve të Forcës së Sigurisë së Kosovës (FSK), implementimin e Programit të Mbrojtjes Gjithëpërfshirëse, si dhe për avancimin e kapaciteteve për prodhimin e municioneve.

Sipas Ministrisë së Mbrojtjes, Franca mbetet një aleat dhe partner kyç për Republikën e Kosovës, duke e mbështetur vendin në faza të rëndësishme të shtetndërtimit dhe zhvillimit. Synimi i përbashkët mbetet që ky partneritet të thellohet edhe më tej, me fokus të veçantë në forcimin e kapaciteteve mbrojtëse të Kosovës përmes hapjes së kanaleve të reja të bashkëpunimit institucional.