LSDM: Paga minimale prej 600 eurosh u refuzua nga shumica parlamentare

Lidhja Socialdemokrate e Maqedonisë (LSDM) ka akuzuar qeverinë për mospërmbushjen e premtimeve ekonomike, duke vënë në pikëpyetje deklaratat për rritjen e pagave dhe pensioneve, si dhe përmirësimin e standardit të jetesës së qytetarëve. Sipas partisë, propozimi për rritjen e pagës minimale në 600 euro, i paraqitur në Kuvend, nuk mori mbështetjen e shumicës parlamentare.

Nga LSDM bëhet e ditur se VMRO-DPMNE dhe ZNAM nuk votuan për propozimin, ndërsa deputetët e së Majtës nuk ishin të pranishëm në sallë. Partia thekson se dy paga minimale nuk mjaftojnë për të mbuluar as shportën minimale të konsumit të llogaritur nga qeveria, dhe se me përfshirjen e qirasë, shporta sindikale tejkalon 90 mijë denarë, ndërsa çmimet e karburanteve mbeten në nivele të larta.

Sipas LSDM-së, premtimet për një pagë mesatare prej 1.000 eurosh nuk mund të realizohen vetëm përmes deklaratave politike pa masa konkrete. Partia pretendon se masat e propozuara prej saj në fillim të krizës nuk u pranuan nga qeveria, gjë që ka rënduar buxhetet familjare.