Pse LSDM-ja kundërshton votimin elektronik të diasporës në Maqedoninë e Veriut?
Akuzat për manipulim zgjedhor dhe mungesë kontrolli nënkuptojnë një bllokim të Kodit Zgjedhor me 13.500 amendamente.
SHKUP — Partia Socialdemokrate e Maqedonisë (LSDM) kundërshton ashpër futjen e votimit elektronik për diasporën, duke e quajtur atë një përpjekje të pushtetit për manipulim zgjedhor pa mekanizma kontrolli dhe verifikimi.
Jovana Trençevska, nënkryetare e LSDM-së, deklaroi se refuzimi i Hristijan Mickovskit për të pranuar parime bazë të kontrollit të votimit e bën qëllimin e tij të qartë: "LSDM-ja nuk do të lejojë grabitje zgjedhore. Me 10 mijë amendamente do t’i shfrytëzojmë të gjitha mekanizmat demokratikë dhe parlamentarë për të penguar këtë përpjekje të rrezikshme", theksoi ajo.
Levica, partia e majtë, iu bashkua kritikave, duke akuzuar pushtetin për përpjekje për të kaluar Kodin Zgjedhor pa konsensus të vërtetë politik. "Me 3.500 amendamente, Levica i kundërvihet kësaj përpjekjeje për të shtrembëruar procesin zgjedhor në favor të pushtetit", thuhet në reagimin e tyre.
Kryeministri Mickoski i hodhi poshtë akuzat, duke pohuar se ka pasur debat konstruktiv dhe se shumica e kërkesave të opozitës janë pranuar. Megjithatë, ai theksoi se votimi i diasporës mbetet "vijë e kuqe". "Thoni gjithçka, gjithçka do ta pranojmë. Por vija jonë e kuqe është votimi i diasporës", deklaroi Mickoski.
Kodi Zgjedhor mbetet i bllokuar në Kuvend me rreth 13.500 amendamente, të paraqitura nga LSDM-ja, Levica dhe Partia për Lëvizje Demokratike (PLD). Të tre partitë hedhin dyshime mbi mungesën e transparencës në procesin e votimit elektronik, duke paralizuar miratimin e ligjit.
Debati rreth votimit të diasporës ka ngritur tensionet politike, me opozitën që e sheh këtë si një hap për të manipuluar rezultatet zgjedhore, ndërsa qeveria e mbrojnë si një të drejtë themelore për bashkatdhetarët jashtë vendit.
Burim: TV21
— Redaksia ZHURMA