Kush u arrestua për zjarrin afër Selanikut?

SELANIK — Autoritetet greke arrestuan rreth mesnatës një 76-vjeçar, të dyshuar se e ka shkaktuar zjarrin që dogji dy objekte industriale në Oreokastro, periferi e Selanikut, njoftoi shërbimi zjarrfikës grek. I dyshuari besohet të ketë qenë i dehur, sipas burimeve të cituara nga Portalb.mk.

Zjarri, që gjatë natës shkaktoi evakuime, tashmë është lokalizuar në masë të madhe dhe nuk ka më vatra aktive. Rreth 160 zjarrfikës, me mbi 50 automjete zjarrfikëse, pesë ekipe tokësore, dy avionë dhe dy helikopterë, vazhdojnë të qëndrojnë në vendngjarje.

Gjatë natës u evakuuan tri fshatra dhe një shtëpi kujdesi ku ishin të strehuar 157 persona me aftësi të kufizuara. Katër zjarrfikës u lënduan gjatë operacionit — tre prej tyre u dërguan në spital për probleme me frymëmarrjen, ndërsa një mori trajtim për një lëndim ortopedik.

Burim: Portalb
— Redaksia ZHURMA