Kush përfiton nga rritja e pagës minimale në €500?

PRISHTINË — Rreth 150 mijë punëtorë të sektorit privat përfitojnë nga rritja e pagës minimale, u shpreh kryeministri në detyrë Albin Kurti në Kongresin e 9-të Zgjedhor të Bashkimit të Sindikatave të Pavarura të Kosovës. Në Kongres morën pjesë edhe Luc Triangle, sekretar i Përgjithshëm i Konfederatës Ndërkombëtare të Sindikatave, dhe Peter Sherer, zëvendës sekretar i Përgjithshëm i Konfederatës Evropiane të Sindikatave. Paga minimale e re, e cila hyri në fuqi më 1 korrik, është 500 euro bruto.

Kryeministri theksoi se për më shumë se një dekadë, paga minimale ishte e pandryshuar. Nga viti 2011, ajo kishte qëndruar në 130 dhe 170 euro, varësisht nga mosha e punëtorit. "Kjo periudhë e gjatë stagnimi ka krijuar vështirësi të rënda për punëtorët e sektorit privat," tha Kurti.

Gjatë qeverisjes së Kurtit, paga minimale u rrit gradualisht: nga 130 dhe 170 euro në 250 euro, më pas në 350 euro, pastaj në 425 euro, e më në fund në 500 euro.

Kurti e përshëndeti punën e sindikatave në mbrojtjen e të drejtave të punëtorëve. Ai tha se një nga çështjet parësore të drejtësisë sociale është paga minimale, dhe prandaj fokusi i Qeverisë mbetet në garantimin e zbatimit të ligjit të punës.

Si pjesë e kësaj përpjekjeje për zbatimin e ligjit të punës, në qershor 2026, u hap konkursi për 39 inspektorë të rinj në Inspektoratin Qendror të Punës. Nga këta, 24 pozicione janë për siguri dhe shëndet në punë, dhe 15 për marrëdhënie pune.

Kryeministri potencoi se Qeveria po punon në përmirësimin e kornizës ligjore në fushën e punës, me synimin që ajo të garantojë përfaqësim më të drejtë të punëtorëve, zgjerim të dialogut social, dhe një balancë më të qëndrueshme midis punëmarrësve dhe punëdhënësve.

Para të pranishmëve, Kurti theksoi se shteti po kalon një fazë të rëndësishme të konsolidimit ekonomik dhe institucional, ku punëtorët mbeten shtylla kryesore e zhvillimit. Paga minimale e re përbën një hap konkret në këtë drejtim.

Burim: Ekonomia Online
— Redaksia ZHURMA