Kush është Anton Frroku, i dënuar 15 herë në 20 vjet dhe në kërkim nga policia?

TIRANË — Taulant Balla, deputet i Partisë Socialiste, zbuloi emrin e një prej protestuesve të përfshirë në incidentet e dhunshme para Kuvendit, i cili ka një histori të gjatë penale. Sipas Ballës, Anton Frroku është i dënuar 15 herë në 20 vjet dhe aktualisht është në kërkim nga policia.

Balla theksoi se protestuesit e vërtetë janë qytetarët që mbushin bulevardin, ndërsa një grup i vogël personash me precedentë penalë janë ata që kryejnë akte dhune. "Kush bën dhunë, është element me precedent të rëndë kriminal," deklaroi ai, duke theksuar se transparenca është e domosdoshme për të identifikuar këta individë.

Ndër emrat e tjerë të përmendur nga Balla si pjesë e grupit me precedentë penalë janë Beti Njuma, Ana Kallaku, Luan Rama, Granit Sokolaj, Fatos Çoçoli, Kastriot Myftaraj, Arjola Shehu, Arjon Muça, Roza Lati, Ester Bylyku, Klodi Karaj, Ronaldo Sharka dhe Albana Çaushaj. Këta individë, sipas tij, kanë qenë pjesë e incidenteve të mëparshme.

Protestat e fundit kanë qenë të shoqëruara me tensione të mëdha, ku protestuesit kanë sulmuar efektivët e policisë dhe kanë hedhur objekte ndaj makinave të zyrtarëve. Sulmet ndaj policisë dhe hedhja e miellit dhe vezëve ndaj makinës së Niko Peleshit janë disa nga incidentet e raportuara.

Balla kërkoi që autoritetet të marrin masa të menjëhershme për të ndaluar individët me precedentë penalë, të cilët, sipas tij, po shfrytëzojnë protestat për të kryer akte dhune. "Kur kemi filluar të bëjmë transparencën, sapo kam njoftuar që njëri prej tyre, person në kërkim që s’është ndaluar, por vjen të bëjë dhunë aty, i dënuar në 20 vjet, 15 herë," tha Balla.

Burim: Ora News
— Redaksia ZHURMA