Ku protestojnë shqiptarët në mbështetje të ish-krerëve të UÇK-së?
Protestat u zhvilluan në disa vende, ndërsa Dhomat e Specializuara në Hagë do të shpallin aktgjykimin ndaj katër ish-krerëve të UÇK-së më 16 shtator.
ZARË — Shqiptarë të shumtë u mblodhën në Zarë të Kroacisë në një protestë në mbështetje të ish-krerëve të Ushtrisë Çlirimtare të Kosovës (UÇK). Hysni Gucati, kryetari i Organizatës së Veteranëve të Luftës, deklaroi se tubimi është organizuar për të kundërshtuar padrejtësitë ndaj ish-pjesëtarëve të UÇK-së.
Pjesëmarrësit brohoritën vazhdimisht "UÇK, UÇK" dhe mbanin flamuj kuqezi, duke shprehur mbështetje për ish-udhëheqësit e Ushtrisë Çlirimtare. Protesta u organizua nga Shoqata e Shqiptarëve të Prefekturës së Zarës, në bashkëpunim me Unionin e Shqiptarëve në Kroaci dhe me iniciativën e Sami Gashit.
Trupi gjykues në Dhomat e Specializuara në Hagë caktoi 16 shtatorin për shpalljen e aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit. Data e shpalljes u shtye për shkak të vëllimit të madh të provave të administruara gjatë procesit gjyqësor.
Protesta të ngjashme janë mbajtur në Shqipëri, në Maqedoni të Veriut dhe në Hagë. Organizata e Veteranëve të Luftës e mbështeti këtë mobilizim, duke i bërë thirrje të gjithë bashkatdhetarëve të marrin pjesë për të shprehur solidaritet me ish-udhëheqësit e Ushtrisë Çlirimtare të Kosovës.
Burim: Lajmi.net
— Redaksia ZHURMA