Pse thotë Krasniqi se opozita i shkon për shtati Kurtit?

PRISHTINË — Kandidati për deputet i Partisë Socialdemokrate, Frashër Krasniqi, ka thënë se partitë opozitare ndihen të intimiduara nga kryeministri në detyrë Albin Kurti dhe se kjo i ka bërë ato të pafuqishme për të funksionuar si opozitë e vërtetë.

Krasniqi ka kritikuar Byronë për konfiskim të pasurisë së pajustifikueshme, duke e quajtur atë "mjet politik për linçime e kontrollim". Ai ka thënë se LDK-ja e ka votuar këtë institucion dhe se partitë e tjera opozitare do ta votojnë gjithashtu, pasi ndihen të kërcënuara nga Kurti. "Ato ndihen të intimiduara prej Kurtit, pasi ndihen se nëse nuk e pranojnë atëherë Kurti do të thotë se keni çfarë me fsheh pasuri të pajustifikueshme", ka thënë ai në emisionin "Zgjedhjet në Kohë".

Ai ka argumentuar se është e pamundur të luftohet "autoritarizmi, nëse gjatë gjithë kohës tregohen shenja gatishmërie për koalicion me të". Sipas tij, mungesa e legjitimitetit opozitar është problemi kryesor i Kosovës sot, duke përmendur që presidentja Vjosa Osmani ka ndenjur me Kurtin "deri në fund" dhe më pas ka shprehur dëshirë për të bashkëpunuar përsëri.

Krasniqi ka akuzuar Osmanin se nuk e ka dekretuar kryeprokurorin e shtetit për më shumë se katër vjet, duke i shkuar kështu për shtati Kurtit. "4 vjet kemi qenë pa kryeprokuror, fiks 4 vjet me ushtrues detyre", ka thënë ai, duke shtuar se Kurti ka deklaruar publikisht kundër një kandidati dhe presidentja i është përgjigjur duke mos e dekretuar atë.

Ai gjithashtu ka kritikuar PDK-në që, sipas tij, kritikon Kurtin për tendenca autokratike, por në fund nuk vendos "vija të kuqe" për Lëvizjen Vetëvendosje. Ka përmendur deklaratën e përfaqësuesit të PDK-së, Arian Tahirit, se partia do t'i bëjë kuorumin VV-së për president pas zgjedhjeve.

Burim: Koha.net
— Redaksia ZHURMA