Kosovë: Fëmijët në fokus të sportit, kampingut dhe thirrjeve për mbrojtje

PRISHTINË — Agjenci shtetërore, komuna dhe organizata të ndryshme kanë zhvilluar të hënën aktivitete me rastin e Ditës Ndërkombëtare të Fëmijëve, ndërsa organizatat për mbrojtjen e tyre kanë ngritur shqetësime për sfidat që vazhdojnë të përballet të miturit në Kosovë.

Në sheshet e Prishtinës, Komiteti Olimpik i Kosovës hapi Javën Olimpike, e cila këtë vit ka në fokus aktivizimin e fëmijëve në sport. Kryetari i KOK-ut, Ismet Krasniqi, tha se në nismë janë përfshirë 26 komuna, me synimin për të nxitur një shoqëri më aktive. "Qëllimi ynë është që sa më shumë t'i aktivizojmë fëmijët, të merren me sport, të largohen nga televizioni, nga telefonat dhe të jenë më të shëndetshëm", deklaroi ai.

Në një aktivitet të Agjencisë për Menaxhimin e Emergjencave, rreth 100 nxënës të klasave të teta dhe të nënta nga Fushë-Kosova, Mitrovica dhe Shtimja morën pjesë në trajnim për kërkim-shpëtim në Qeçevë të Zubin Potokut. Kryeministri në detyrë, Albin Kurti, tha se aktiviteti do t'u ndihmojë të fitojnë aftësi praktike për situata emergjente, përfshirë reagimin ndaj zjarreve dhe dhënien e ndihmës së parë.

Ushtruesja e detyrës së presidentes, Albulena Haxhiu, priti fëmijë në Presidencë e Kuvend, duke theksuar se ata ende përballen me sfida të shumta. "Të drejtat e fëmijëve janë një nga fushat, ku dallimi ndërmjet asaj që shkruhet dhe asaj që zbatohet shihet shumë shpejt", tha ajo, duke shtuar se fëmijët kërkojnë të ndihen të sigurt, të mos përbuzen e të mos stigmatizohen për varfërinë.

Koalicioni i Organizatave për Mbrojtjen e Fëmijëve në Kosovë (KOMF) organizoi aktivitet ndërgjegjësues për rritjen e rasteve të të miturve në konflikt me ligjin. Drejtorja Donejta Sadiku njoftoi se shërbimet për fuqizimin e fëmijëve dhe parandalimin për të rënë në konflikt me ligjin pothuajse janë joekzistente për moshën nën 14 vjeç, ndërsa ka rënie të shqiptimit të masave të diversitetit për këtë grupmoshë.

Burim: Koha.net
— Redaksia ZHURMA