Pse kundërshton Komuna e Çairit kërkesën e opozitës për komisionin e dëmeve?
Institucioni pretendon se mekanizmi për vlerësimin e dëmeve nga fatkeqësitë natyrore është miratuar që në maj nga vetë Këshilli Komunal.
— Komuna e Çairit ka reaguar ndaj pretendimeve të këshilltarëve të opozitës, duke i cilësuar si të pabazuara kërkesat për formimin e një komisioni për evidentimin e dëmeve nga reshjet e fundit. Sipas reagimit zyrtar, Komisioni për vlerësimin dhe përcaktimin e lartësisë së dëmeve është formuar që në muajin maj.
Institucioni thekson se ky vendim është marrë nga Këshilli i Komunës në përputhje me legjislacionin në fuqi, ku në procesin e miratimit kanë marrë pjesë edhe këshilltarët e opozitës. Komuna argumenton se ndërtimi i këtyre mekanizmave institucionale paraprakisht shërben për të siguruar gatishmëri dhe reagim të shpejtë pa pritur ndodhjen e fatkeqësive.
Menjëherë pas reshjeve të dendura, në terren kanë dalë ekipet komunale, Shtabi i Krizave dhe ndërmarrjet publike për të ndërhyrë në të gjitha lokacionet ku ka pasur nevojë. Paralelisht, ka nisur evidentimi i dëmeve, ndërsa komisioni do të vazhdojë procedurat e vlerësimit sipas metodologjisë dhe afateve të përcaktuara me ligj.
Komuna e Çairit u bë thirrje subjekteve politike që të kontribuojnë me informim të saktë dhe konstruktiv për të shmangur krijimin e perceptimeve të pasakta. Kompensimi i dëmeve do të realizohet sipas procedurave ligjore, duke u përkushtuar për trajtimin me profesionalizëm të çdo rasti të paraqitur nga qytetarët.
Burim: Almakos
— Redaksia ZHURMA