Kina planifikon sistemin modern të shërbimeve klimaterike deri në 2030

Sipas të dhënave të publikuara nga “Xinhua”, Administrata Meteorologjike e Kinës ka ndërmarrë një plan që synon ngritjen e një sistemi modern të shërbimeve klimaterike brenda periudhës së Planit të 15-të Pesëvjeçar, i shtrirë ndërmjet viteve 2026 dhe 2030. Strategjia mbështetet tek inovacioni dhe inteligjenca digjitale për të arritur standarde të larta në këtë fushë.

Dokumenti parashikon arritjen e pavarësisë teknologjike, zgjerimin e operacioneve të digjitalizuara dhe krijimin e platformave të integruara. Për këtë qëllim, do të ngrihet një rrjet i përbashkët ndarjeje të të dhënave mes niveleve kombëtare dhe krahinore. Ndërkohë, strukturat qendrore do të udhëheqin procesin e kërkim-zhvillimit, vendosjes së standardeve dhe krijimit të mjeteve të reja parashikuese të mbështetura në inteligjencën artificiale.

Gjatë pesë viteve në vijim janë përcaktuar 19 detyra prioritare që mbulojnë monitorimin e sistemit të Tokës, vlerësimin e rrezikut nga fatkeqësitë, si dhe përmirësimin e shërbimeve sektoriale dhe reformave institucionale. Përdorimi i deritanishëm i mjeteve si dronët për vëzhgimin e tajfuneve ka dhënë rezultate në përmirësimin e paralajmërimit të hershëm.