KiE: Paraburgimi i zgjatur i Veliajt cenon të drejtat dhe votuesit

Dokumenti i fundit i monitorimit mbi zbatimin e Kartës Evropiane të Vetëqeverisjes Vendore në Shqipëri, i përgatitur nga Kongresi i Autoriteteve Lokale dhe Rajonale i Këshillit të Europës, i ka kushtuar vëmendje të veçantë pozicionit të kryebashkiakut të Tiranës, Erion Veliaj. Duke u mbështetur te qëndrimet e Komisionit të Venecias, autorët e dokumentit theksojnë se masa e arrestit me afat të zgjatur ndaj drejtuesve vendorë kërkon trajtim tepër të kujdesshëm.

Sipas gjetjeve, një masë e tillë mund të ngrejë dyshime serioze për cenimin e lirive individuale sipas Konventës Europiane të të Drejtave të Njeriut, si dhe të vullnetit të qytetarëve që i kanë votuar ata. Raporti përmbledh zhvillimet që nga ndalimi i kreut të bashkisë, procedurat për shkarkimin e tij, deri te vendimmarrja e Gjykatës Kushtetuese që rikonfirmoi funksionin e tij zyrtar, pavarësisht se në realitet ai nuk mund t'i kryejë detyrat për shkak të mbajtjes në qeli.

Gjithashtu, materiali sjell në vëmendje vendimin tjetër kushtetues që ia ktheu dosjen për shqyrtim Gjykatës së Lartë, pasi u konstatua mungesë arsyetimi proporcional për masën e sigurisë. Dokumenti shton se dhjetëra krerë bashkish, aktualë apo të kaluar, janë përballur me hetime për korrupsion gjatë viteve të fundit. Arrestimi i Veliajt ndodhi gjatë muajit shkurt, ndërsa në shtator këshilli bashkiak votoi shkarkimin e tij.