KB Peja emëron trajnerin e ri malazez pasi ndahet me Kakiouzis

Klubi i Basketbollit Peja ka njoftuar se ka ndërprerë bashkëpunimin me trajnerin Michalis Kakiouzis përmes një marrëveshjeje të dyanshme. Largimi i ish-basketbollistit të njohur grek erdhi pas humbjes që skuadra pejane pësoi nga Rahoveci gjatë fundjavës. Në njoftimin e lëshuar nga klubi u theksua falënderimi ndaj trajnerit Kakiouzis për profesionalizmin, përkushtimin, korrektësinë dhe kontributin e dhënë gjatë periudhës së bashkëpunimit.

Drejtuesit e klubit kanë gjetur menjëherë zëvendësuesin e tij, duke zyrtarizuar në krye të shtabit teknik malazezin Bosko Radovic, i cili është ish-trajner i Kombëtares së Malit të Zi dhe bën kështu kalimin e tij në basketbollin kosovar. Angazhimi i fundit i Radovic ka qenë në Kinë te skuadra Guangdong Southern Tigers, ku ka shërbyer si asistent i Nenad Jakoljevic.