Pse u fundosën kamerat e sigurisë në Postën e Shqipërisë?
Prokuroria mbështet dyshimet për përvetësimin e 69 milionë lekëve në Filialin e Postës Shqiptare në Durrës
19 korrik, 15:02 — Pamjet e kamerave të sigurisë janë një nga provat mbi të cilat Prokuroria mbështet dyshimet për përvetësimin e 69 milionë lekëve në Filialin e Postës Shqiptare në Durrës. Në dosjen hetimore përshkruhen me detaje një sërë episodesh të regjistruara gjatë muajve prill dhe maj 2026.
Sipas organit të akuzës, më 2 prill, në orën 15:28, në arkën e filialit mbërrin një thes me para i shoqëruar nga eskorta e bankës. Pak minuta më vonë, shefja e Financës Valbona Duni e merr thesin dhe e dërgon në zyrën e saj.
Më pas, sipas kamerave, thesin e çon në zyrën e drejtoreshës Elisabeta Mataj. Vetëm pak minuta më vonë, në orën 15:39, drejtoresha largohet nga zyra me një qese transparente, ndërsa po atë ditë në sistem rezulton të jetë prerë një mandat-pagesë prej 5 milionë lekësh për degën postare të Shijakut.
Sipas Prokurorisë, kjo nuk ishte një ngjarje e izoluar. Pamje të ngjashme janë regjistruar edhe më 14, 15, 20, 24 dhe 30 prill, si edhe më 7, 8 dhe 21 maj. Në disa raste, sipas dosjes, shihen thasë me para, ndërsa në raste të tjera pako me kartëmonedha të prerjes 5 mijë lekë.
Në të gjitha rastet, sipas Prokurorisë, fondet dilnin nga arka, por nuk provohet se mbërritën ndonjëherë në degët për të cilat ishin përgatitur mandat-pagesat. Pikërisht këto pamje, të kombinuara me dokumentacionin kontabël dhe deklarimet e personave të përfshirë, konsiderohen nga organi i akuzës si pjesë e provave që mbështesin dyshimet për skemën e përvetësimit të fondeve.
Burim: Report Tv, https://report.al/kamerat-e-sigurise-fundosin-zyrtaret-e-postes-pamjet-tregojne-levizjet-e-thaseve-me-para-nga-arka-drejt-zyres-se-drejtoreshes/ — Redaksia ZHURMA