Jon Sinoimeri hedh poshtë akuzat e Edi Ramës për precedentë penalë

Studenti 20-vjeçar i Fakultetit të Mjekësisë, Jon Sinoimeri, hodhi poshtë akuzat e kryeministrit Edi Rama, i cili e përfshiu emrin e tij në një listë me 45 protestues dhe pretendoi se ai nuk është student, por një person me precedentë penalë për prodhim dhe shitje të lëndëve narkotike.

Më parë, kryeministri publikoi foton e studentit me një shirit të zi mbi sy duke pretenduar se persona me histori kriminale kishin ushtruar dhunë gjatë protestave nën maskën e studentëve. Gjithashtu gjatë muajit qershor ishte zbatuar një strategji e ngjashme ndaj pjesëmarrësve në protestat paqësore kundër një projekti turistik në zonën e mbrojtur të Zvërnecit.

Gjatë një marshimi të qindra studentëve dhe pedagogëve drejt Ministrisë së Arsimit të premten, Sinoimeri tregoi për mediat listën e notave me mesatare 10 që provon se është student ekselence. Ai sqaroi se hera e vetme kur ka qenë në polici ishte më 13 tetor, ku u shoqërua gjatë protestës dhe u mbajt për 7 orë e gjysmë në komisariat. Drejtoresha e Agjencisë për Media dhe Informim, Manjola Hasa, deklaroi se kryeministri i tha provat në daljen e tij, ndërsa institucioni nuk dha dëshmi të tjera. Nga ana e shoqërisë civile, gazetari Mentor Kikia dhe drejtori i Institutit për Studime Politike, Afrim Krasniqi, e cilësuan publikimin e fotove dhe akuzat si një akt penal e antiligjor.

Drejtori i Institutit për Studime Politike, Afrim Krasniqi, iu bëri thirrje institucioneve të pavarura, komisionerëve për të drejtat e njeriut si dhe SPAK-ut që të nisin hetime serioze ndaj veprimeve të tilla.

«Zoti kryeministër paska dalë sot dhe më ka akuzuar për prodhim dhe shitje narkotikësh, por unë jam student i Mjekësisë, e kam të shkruar këtu dhe s’e di se çfarë legjendash me mbret shpik ky,» tha Sinoimeri.