Pse Irani po ankohet zyrtarisht në FIFA gjatë Kupës së Botës?
Trajneri Amir Ghalenoei e cilësoi Iranin si 'skuadrën më të diskriminuar' pas kufizimeve të udhëtimit mes Los Anxhelosit dhe Meksikës.
LOS ANXHELOS — Federata e Futbollit të Iranit do të paraqesë një ankesë zyrtare në FIFA për trajtimin që pretendon se po merr gjatë Kupës së Botës 2026. Pas barazimit 1-1 ndaj Zelandës së Re në ndeshjen hapëse të Grupit G, trajneri Amir Ghalenoei e cilësoi Iranin si 'skuadrën më të diskriminuar' të këtij turneu.
Sipas Ghalenoeit, skuadra u detyrua të largohej menjëherë pas ndeshjes nga Los Anxhelosi drejt kampit bazë në Tijuana të Meksikës, pa pasur mundësi rikuperimi. Trajneri shtoi se fillimisht ishte planifikuar që ekipi të qëndronte dy ditë para ndeshjes dhe një natë shtesë pas saj, por kjo nuk u miratua.
Problemet vazhduan edhe para përballjes së radhës me Belgjikën, e cila zhvillohet të dielën. Federata iraniane kishte kërkuar që skuadra të udhëtonte në Los Anxhelos dy ditë para sfidës, por organizatorët lejuan mbërritjen vetëm 24 orë para saj. Sipas tyre, kjo kufizon kohën për stërvitje dhe përshtatje lokale.
Në një deklaratë zyrtare, Federata e Futbollit të Iranit theksoi se kufizimet nuk janë në përputhje me parimin e trajtimit të barabartë. Pavarësisht vështirësive të udhëtimit, kombëtarja ka bërë të ditur se do të vazhdojë përgatitjet normale dhe do të fokusohet plotësisht te përballja e rëndësishme.
Burim: Gazeta Express
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.