Investimet e huaja: Si mund t'i tërheqë qeveria e re e Kosovës?
Profesori universitar Medain Hashani kërkon ndryshim të politikave fiskale dhe diplomaci ekonomike që Kosova të mos stagnojë më pas vendeve fqinje.
PRISHTINË — Profesori universitar, Medain Hashani, ka deklaruar në emisionin "EURO n’T7" se zhvillimi ekonomik duhet të jetë prioriteti i parë i qeverisë së re të vendit. Ai theksoi se Kosova aktualisht ka stagnuar ekonomikisht, derisa vendet përreth kanë pasur një zhvillim të dukshëm.
Hashani ka drejtuar kritika ndaj të gjitha partive politike, duke pretenduar se gjatë fushatës nuk e kanë pasur fokusin e duhur te çështjet ekonomike. Sipas tij, detyra kryesore e ekzekutivit të ri është krijimi i kushteve për sjelljen e investimeve të huaja.
Për të qenë konkurrues me Maqedoninë e Veriut, Shqipërinë dhe Serbinë, profesori kërkon ndryshim të politikave fiskale. Ai shton se reformat fiskale nuk duhet të mbeten vetëm në letër dhe legjislacion, por duhet të zbatohen me përpikëri edhe në terren.
Në fund, Hashani sugjeron zhvillimin e një diplomacie ekonomike për të lobuar për investitorë. Ky lobim, sipas tij, duhet të orientohet fillimisht te diaspora kosovare e më pas të shtrihet edhe te shtetet e Bashkimit Evropian.
Burim: Gazeta Express
— Redaksia ZHURMA