Kush dyshohet për helmimin masiv të qenve endacakë në Mitrovicë?
Aktivistët për mbrojtjen e kafshëve ngrisin alarmin për helmime në hapësira publike pranë Urës së Ibrit, duke akuzuar institucionet për mungesë reagimi.
MITROVICË — Pas sulmit të një qytetari nga qentë endacakë pranë Urës së Ibrit ditën e djeshme, në qytet dyshohet se ka nisur helmimi masiv i qenve endacakë. Aktivistë për mbrojtjen e kafshëve kanë ngritur alarmin për helmime në pjesë të ndryshme të qytetit, duke akuzuar institucionet se nuk kanë reaguar pavarësisht raportimeve të vazhdueshme.
Në një bashkëbisedim për KosovaPress, një aktiviste për mbrojtjen e kafshëve deklaroi se situata është alarmante. Ajo tha se ishte telefonuar nga qytetarë dhe kishte dalë në vendin e ngjarjes, ku kishte parë disa qen të helmuar. "Jam e shokuar, ende nuk po mundem me ardh në vete. E kemi lajmëruar policinë, por nuk është ndërmarrë asgjë. Na kanë thënë të telefonojmë në 112, por as aty nuk kemi marrë ndihmë", tha ajo.
Sipas aktivistes, në vendin e ngjarjes kanë qenë të pranishëm edhe pjesëtarë të KFOR-it dhe karabinierët pranë Urës së Ibrit. Disa qen kanë arritur t'i shpëtojnë, ndërsa një qen tjetër ishte në gjendje shumë të rëndë. Ajo shtoi se ky nuk është rasti i parë: "Ky është ndoshta rasti i katërt ose i pestë që helmohen qentë në qytetin tonë. Na kanë njoftuar se mungojnë edhe rreth 20 qen." Ajo dhe një kolege kanë arritur t'i shpëtojnë rreth 5-6 qen, por numri i saktë i qenve të helmuar mbetet i panjohur.
Aktivistja ngriti shqetësim edhe për përdorimin e helmeve në hapësira publike, duke paralajmëruar se ato paraqesin rrezik për qytetarët. "Shkallët tek Ura e Ibrit kanë qenë përplot me helm. Aty kalojnë fëmijë, gra shtatzëna dhe qytetarë të tjerë. Ky helm nuk ndikon vetëm te qentë, por edhe te njerëzit", tha ajo. Aktivistët kanë kontaktuar Komunën e Mitrovicës përmes emailit dhe rrjeteve sociale, por nuk kanë marrë asnjë përgjigje.
Burim: Lajmi.net
— Redaksia ZHURMA