Hapja e konsullatës serbe në Shkodër është pjesë e luftës asimetrike, thotë Bello

SHKODËR — Hapja e konsullatës serbe në Shkodër është pjesë e luftës asimetrike që Serbia zhvillon për të konsoliduar pozitat e spiunazhit dhe për ta përdorur atë për destabilizimin e shtetit shqiptar, ka argumentuar historiani Hasan Bello në një analizë të publikuar në Gazeta Dielli.

Bello shkruan se ambasadat dhe konsullatat kanë pasur gjithmonë dy funksione: përfaqësimin zyrtar të shtetit dhe mbrojtjen e interesave të qytetarëve, si dhe funksionin informativ. Sipas tij, në vitet 1920-1930 Jugosllavia i imponoi Shqipërisë hapjen e tre konsullatave: në Shkodër, Korçë e Vlorë.

Konsullata e Shkodrës, thotë Bello, ishte nxitësja kryesore, pas agjenturës italiane, për ngjarjet e qershorit 1924. Një relacion i prefektit drejuar ministrit të Brendshëm flet për një agent të shërbimit sekret të infiltruar në konsullatë, i cili kishte informuar për një atentat që do të destabilizonte shtetin shqiptar.

Më 6 prill 1924 u vranë dy turistë amerikanë në pyllin e Mamurrasit, kurse më 20 prill u plagos rëndë Avni Rustemi, që vdiq pas disa ditësh; të dyja ngjarjet çdo ditë e më shumë implikojnë dorën e Serbisë përmes konsullatës së Shkodrës. Në 1932, konsullata jugosllave në Vlorë financoi Organizatën e Fshehtë të Vlorës, kurse ajo në Korçë rekrutoi një numër të madh të rinjsh që më vonë do të luajnë një rol të rëndësishëm në drejtimin e shtetit.

Duke kthyer sytë nga sotja, Bello konkludon se rihapja e konsullatës serbe në Shkodër synon të forcojë rrjetin e informatorëve dhe të destabilizojë shtetin shqiptar, ashtu siç vepruan konsullatat jugosllave në vitet 1920-1930.

Burim: Dielli (Vatra, SHBA)
— Redaksia ZHURMA