Çfarë kërkoi Hamza për numërimin e votave?
Kryetari i PDK-së falënderon qytetarët për kulturën demokratike dhe bën thirrje për ruajtjen e integritetit të numërimit.
PRISHTINË — Kryetari i Partisë Demokratike të Kosovës, Bedri Hamza, ka falënderuar qytetarët për pjesëmarrjen dhe sjelljen dinjitoze gjatë procesit zgjedhor të së dielës, duke vlerësuar kulturën demokratike të treguar në mbarë vendin.
"Qytetarët e Kosovës treguan edhe një herë qytetari, përgjegjësi dhe kulturë demokratike. Në një proces të qetë e dinjitoz, ata dëshmuan se besojnë në fuqinë e votës dhe në të drejtën për të vendosur për të ardhmen e vendit tonë", deklaroi Hamza.
Ai shprehu mirënjohje për institucionet përgjegjëse, komisionerët, vëzhguesit, mediat dhe forcat e rendit për angazhimin në mbarëvajtjen e procesit. Hamza theksoi se prioritet mbetet ruajtja e integritetit të procesit dhe respektimi i plotë i vullnetit qytetar, duke bërë thirrje që çdo votë të numërohet me kujdes dhe transparencë.
"Demokracia nuk përfundon me hedhjen e votës në kuti, por vazhdon edhe me respektimin e saj. Le të kujdesemi së bashku që çdo votë e qytetarëve të ruhet dhe të mbrohet deri në fund", u shpreh ai.
Burim: Zëri
— Redaksia ZHURMA