Francë: Autobusi me nxënës del nga rruga, raportohet për viktima

Një aksident i rëndë rrugor ka ndodhur mëngjesin e 6 nëntorit në qytetin Lent të Francës lindore, ku një autobus që transportonte nxënës ka dalë nga rruga rreth orës 07:00 dhe është përplasur me një pemë, duke lënë dy të vdekur dhe 16 të lënduar, ndërsa tre prej tyre ndodhen në gjendje të rëndë shëndetësore.

Ngjarja e rëndë është regjistruar në orët e para të mëngjesit në lindje të vendit, në një zonë rreth 55 kilometra nga kufiri me Zvicrën dhe në verilindje të Lionit, teksa automjeti po transportonte fëmijë dhe nxënës në rrugët e rajonit.

Sipas kryebashkiakut të qytetit Lent, Yves Cristin, autobusi ka humbur kontrollin, ka dalë nga rruga dhe ka përfunduar në një kanal anësor para se të godiste fuqishëm një pemë. Ministria franceze e Arsimit dhe prefektura e Ain kanë konfirmuar pasojat fatale, ndërsa ministri i Arsimit, Edouard Geffray, ka shprehur tronditjen e tij për ngjarjen, duke theksuar se situata është veçanërisht e dhimbshme për shkak se në autobus udhëtonin fëmijë. Një dëshmitar që mbërriti ndër të parët në vendngjarje tregoi se fillimisht kishte vënë re degë të thyera pemësh dhe më pas pa nxënës që dilnin nga automjeti, duke shtuar se disa prej tyre bërtisnin e qanin ndërsa pamja ishte tronditëse.

Për menaxhimin e situatës dhe ndihmën e personave të prekur, në vendngjarje janë mobilizuar forca të shumta policie, zjarrfikësish dhe ekipe mjekësore, ndërsa për transportimin e të plagosurve në gjendje më të rëndë është vënë në dispozicion edhe një helikopter për t'i dërguar në një spital të specializuar. Ministri i Transportit, Philippe Tabarot, ka bërë të ditur se është nisur drejt vendit të aksidentit për të ndjekur nga afër zhvillimet. Autoritetet u kanë bërë thirrje qytetarëve të shmangin zonën për shkak të kufizimeve dhe devijimeve të qarkullimit që u krijojnë hapësirë ekipeve të emergjencës.