Filipçe: Qeveria nuk ka plan kundër shtrenjtimit të shtatorit
Kryetari i LSDM-së paralajmëroi se standardi i jetesës do të vazhdojë të bjerë
SHKUP — Kryetari i LSDM-së, Venko Filipçe, paralajmëroi se standardi i jetesës do të vazhdojë të bjerë dhe se qytetarët i pret një vjeshtë e vështirë. Duke folur për gjendjen ekonomike dhe sociale në vend, ai theksoi se Qeveria nuk ka asnjë plan për t'i mbrojtur qytetarët nga goditja e re e çmimeve që pritet në shtator.
Sipas Filipçes, zhvillimet rajonale dhe globale mund ta përkeqësojnë më tej situatën ekonomike, ndërsa Qeveria, sipas tij, nuk po ndërmerr asnjë masë për të parandaluar valën e re të shtrenjtimit. Filipçe theksoi se goditja më e rëndë mbi buxhetet familjare do të vijë në shtator, kur qytetarët do të përballen me shpenzime shtesë, ndërsa Qeveria nuk paralajmëron as rritje pagash, as masa për zbutjen e goditjes së çmimeve.
“Kur fillon shtatori, fillojnë shpenzimet për shkollat. Nuk ka asnjë paralajmërim për rritje pagash. Çfarë do të ndodhë me derivatet? A do të sjellë ky shtrenjtim një spirale të re çmimesh? Po shihni çfarë ndodh me çmimet në markete. Do të ketë krizë të madhe. Mendoj se çmimet sërish do të rriten pas shtrenjtimit të fundit të derivateve. Askush nuk i kontrollon çmimet dhe ato rriten. Askush nuk ndërmerr masa”, tha Filipçe.
Burim: Telegrafi
— Redaksia ZHURMA