Esmeralda Kazia fiton çmimin botëror për sigurinë kibernetike
Shqiptarja e parë që fiton këtë titull prestigjioz, duke vlerësuar lidershipin dhe kontributin në avancimin e sigurisë kibernetike
TIRANË — Shqipëria ka shënuar një sukses të rëndësishëm në arenën ndërkombëtare të sigurisë kibernetike. Esmeralda Kazia është shpallur "Cybersecurity Woman of the World 2026", duke u bërë shqiptarja e parë që fiton këtë titull prestigjioz.
Ky titull vlerëson lidershipin, vizionin dhe kontributin në avancimin e sigurisë kibernetike në nivel global. Çmimi iu dorëzua gjatë ceremonisë së organizuar nga United Cybersecurity Alliance në Austri dhe Lihtenshtejn.
Esmeralda Kazia dha një intervistë për transmetuesin publik austriak ORF, ku theksoi rëndësinë e sigurisë kibernetike për mbrojtjen e institucioneve dhe besimit publik. Ajo komentoi se ky titull përfaqëson një përgjegjësi të madhe për të vazhduar punën në forcimin e sigurisë kibernetike dhe mbrojtjen e infrastrukturave kritike.
Kazia aktualisht mban detyrën e Drejtoreshës Ekzekutive të Teknologjisë (CTO) për Teknologjinë Operacionale (OT), Sistemet e Kontrollit Industrial (ICS) dhe Automatizimin në Korporatën Elektroenergjetike Shqiptare (KESH). Me mbi 13 vite përvojë në sigurinë kibernetike, transformimin digjital dhe mbrojtjen e infrastrukturave kritike, Kazia ka përfaqësuar Shqipërinë në forume të nivelit të lartë.
Burim: KultPlus
— Redaksia ZHURMA