Ekstradohen dy persona të kërkuar nga Mali i Zi dhe Gjermania

Policia e Kosovës ka njoftuar se më 23 tetor 2026 janë ekstraduar dy shtetas kosovarë të kërkuar me urdhër-arreste ndërkombëtare nga institucionet e drejtësisë. Veprimet janë kryer nga Drejtoria për Bashkëpunim Ndërkombëtar Policor, në koordinim me njësitet relevante dhe institucionet e drejtësisë.

Shtetasi i Kosovës me inicialet S.M., i cili kërkohej për përfshirje në veprimtari penale, është ekstraduar nga Mali i Zi. Pas përfundimit të procedurave ligjore, ai është dorëzuar në Qendrën Korrektuese në Prishtinë për të filluar vuajtjen e dënimit.

Po të njëjtën ditë, nga Gjermania është ekstraduar shtetasi tjetër i Kosovës, E.B., i cili gjithashtu kërkohej me urdhër-arrest ndërkombëtar. Pas mbërritjes, ai i është dorëzuar njësive përkatëse të Drejtorisë Rajonale të Policisë në Prizren për procedura të mëtejshme ligjore.

Policia ka theksuar se Drejtoria për Bashkëpunim Ndërkombëtar Policor do të vazhdojë shkëmbimin e informacioneve me institucionet vendore, shtetet dhe organizatat ndërkombëtare për parandalimin dhe zbulimin e aktiviteteve kriminale, si dhe gjurmimin e personave dhe grupeve kriminale.