Ekspertët: Foshnjat nën 18 muaj duhet t'i shmangin ekranet

Pajisjet digjitale përdoren zakonisht nga prindërit për të qetësuar të vegjlit, por dy vitet e para të jetës përbëjnë fazën kur truri ka një zhvillim të shpejtë dhe nuk duhet të ballafaqohet me teknologjinë në dëm të lojës dhe komunikimit. Sipas Akademisë Amerikane të Pediatrisë dhe Organizatës Botërore të Shëndetësisë, fëmijët nën moshën 18 muajsh nuk duhet të përdorin ekrane, me përjashtim të rasteve të videotelefonatave me familjarët, ndërsa pas kësaj periudhe deri në 24 muaj mund të shikohen përmbajtje edukative me praninë e prindërve. Për grupmoshën ndërmjet dy dhe pesë vjeç, koha para ekranit rekomandohet të mos kalojë rreth një orë gjatë ditës.

Gjatë kësaj faze të hershme, fëmijët mësojnë duke prekur objektet, duke dëgjuar zëra dhe duke vëzhguar mimikat e fytyrës, çka ndihmon aftësitë shoqërore dhe gjuhësore. Përdorimi i tepërt sjell rrezikun e vështirësimeve në gjuhë dhe ua heq mundësinë vogëlushëve që të mësojnë përballimin e emocioneve dhe mërzitjes pa ndihmën e telefonit. Ndërkohë, shikimi i videove para gjumit ndikon negativisht në pushim për shkak të ngarkesës nga tingujt dhe lëvizjet e shpejta, duke pakësuar edhe kohën e lëvizjes në botën reale.

Për të evituar përdorimin e pajisjeve, prindërit mund të përdorin alternativa si leximi i librave me figura, këngët, bisedat dhe shëtitjet, ndërsa vaktet e ushqimit mund të shërbejnë si mundësi komunikimi dhe zbulimi të shijeve në familje.