Dy motrat Zubaku nga Kamenica humbin jetën në A5 të Gjermanisë

APPENWEIER — Një tragjedi e rëndë ka goditur fshatin e Topanicës së Kamenicës: dy motrat Zubaku — E. Zubaku, 24 vjeçe, dhe A. Zubaku, 18 vjeçe — humbën jetën në autostradën A5 në Gjermani. Policia gjermane ka dhënë detaje për Klankosova.tv rreth rrethanave të aksidentit fatal.

Aksidenti i parë ndodhi pak pas orës 11:30 pranë zonës së pushimit Renchtal. Dy automjete u përplasën gjatë një manovre ndërrimi korsie — nga korsia e mesme në atë të majtë. Për shkak të shpejtësisë së lartë, drejtuesit humbën kontrollin mbi automjetet, të cilat u ndalën në rrugë. Një person mbeti i plagosur rëndë.

Pengesat e krijuara nga aksidenti i parë detyruan drejtuesit e automjeteve pas tyre të frenonin papritur. Si pasojë, pranë nyjës së Appenweierit ndodhi një aksident i dytë i rëndë ku u përfshinë pesë automjete, sipas konfirmimit të policisë gjermane për Klankosova.tv.

Katër nga pesë automjetet nuk patën të lënduar. E. dhe A. Zubaku, që udhëtonin në një automjet tip Smart, humbën jetën në vendngjarje si pasojë e plagëve të rënda. Dy bijat e Topanicës nuk u kthyen.

Drejtimi verior i autostradës A5 u mbyll për disa orë për operacionet e shpëtimit, hetimet dhe pastrimin e rrugës. Dëmi material paraprak vlerësohet mbi 100 mijë euro. Hetimet për zbardhjen e plotë të rrethanave të aksidentit janë ende në vazhdim.

Burim: Klan Kosova
— Redaksia ZHURMA