Dua Lipa: Sunny Hill Festival, krenari dhe emocione
Festivali ka vendosur Kosovën në hartën ndërkombëtare të festivaleve muzikore dhe ka sjellë vëmendje globale për Prishtinën.
PRISHTINË — Këngëtarja shqiptare Dua Lipa përfundoi natën e tretë e përmbyllëse të Sunny Hill Festival, duke ndarë pamje nga atmosfera e ngjarjes dhe emocionet e përjetuara gjatë këtij edicioni.
Në fotografitë e publikuara, ajo shihet duke shijuar muzikën dhe momentet e veçanta së bashku me familjen e saj — babanë Dukagjin Lipa, motrën Rina Lipa dhe vëllanë Gjin Lipa. Krahas postimit, Dua ka shprehur krenarinë dhe mirënjohjen për realizimin e festivalit në qytetin e saj.
"Vërtet nuk ka fjalë për gëzimin, krenarinë dhe mirënjohjen që ndiejmë duke arritur ta organizojmë këtë festival për qytetin tonë me familjen tonë", ka shkruar ajo. Ajo ka provuar të gjejë momente të qeta për ta përjetuar atmosferën e veçantë të Sunny Hill, falënderoi të gjithë pjesëmarrësit dhe tha se mezi pret të rikthehen sërish vitin e ardhshëm në atë që e quajti kodrën e festivalit, që ka vendosur Kosovën në hartën ndërkombëtare të festivaleve muzikore.
Burim: Zëri
— Redaksia ZHURMA
