Pse Dritan Abazoviq udhëheq pëlqyeshmërinë në Mal të Zi?

PODGORICË — Lideri i Lëvizjes Qytetare URA, Dritan Abazoviq, vazhdon të mbajë mbështetjen më të lartë personale në skenën politike të Malit të Zi. Sipas një sondazhi të opinionit publik të realizuar gjatë javës së parë të qershorit 2026, ai kryeson listën e politikanëve me një vlerësim neto pozitiv prej 37 për qind.

Sondazhi i publikuar nga portali 24kroz7 tregon se Abazoviq ka lënë pas kryeministrin aktual Milojko Spajiq, i cili ka marrë 25 për qind mbështetje neto. Pas tyre vjen lideri i Partisë Demokratike Popullore, Milan Knezeviq, me 14 për qind, ndërsa ish-presidenti i vendit, Milo Gjukanoviq, ruan 12 për qind mbështetje.

Në mesin e politikanëve me bilanc pozitiv renditen edhe figura të tjera si lideri i Aleancës Evropiane, Boris Mugosha, me 10 për qind të mbështetjes. Ndërkaq, kryetari i ri i Partisë Demokratike të Socialistëve, Danijel Zhivkoviq, mbyll këtë listë me 5 për qind mbështetje neto pozitiv në këtë sondazh.

Për sa i përket partive, Partia Demokratike e Socialistëve mbetet subjekti më i madh në vend me 23.6 për qind mbështetje. Ajo ndiqet nga Lëvizja Evropa Tani me 15.1 për qind dhe Nova Srpska Demokratija me 9.3 për qind, ndërsa Lëvizja URA e Abazoviqit renditet e katërta me 8.1 për qind.

Më pas vijnë DNP me 7.8 për qind, Demokratët me 5.5 për qind, Aleanca Evropiane me 4.8 për qind dhe Partia Boshnjake me 3.9 për qind. Jashtë parlamentit mbeten SNP me 2 për qind dhe lëvizja Preokret me 1.2 për qind, teksa 18.7 për qind e qytetarëve janë të pavendosur.

Shifrat e sondazhit dëshmojnë një hendek të qartë mes peshës reale të partive dhe popullaritetit të liderëve të tyre. Ky hendek tregon se në Malin e Zi po forcohet gjithnjë e më shumë personalizimi i politikës, ku figura e liderit po peshon më shumë sesa vetë programi politik i partive.

Burim: Albinfo.ch
— Redaksia ZHURMA